زادت في الفترة الاخيرة ..(اضرابات عمال المصافي) بعدن.. ولمّا تسألهم لشوه تضربوا عن العمل ..؟ يقلوّلك .. نحنا بلا (مشاهرة) .. ولمّا تًقل لهم كيف بلا (مشاهرة) .. وانتوا استلمتوا المشاهرة لما (شهر ديسمبر) ..؟ يقلوّلك .. يه استلمنا لماّ (ديسمبر) .. بس لنا مشاهرات(اربعة شهور) عند الحكومة .. متأخرة من (ايام الحرب) .. ايوة وبعدين ..؟ وبعدين يا (لحجي) .. يا عيني ويا حبيب قلبي ..

باقي حق اكرامية رمضان.. وحق كبش العيد الزغير والكبير.. وحق المدارس.. والعمل الاضافي.. والحافز الشهري.. والحافز السنوي.. وحق الحوايج.. وحق هنا .. وهنا.. وانته تعرف يا (لحجي) الدنيا غلا.. شوه عاد باقي معاكم من خبر ثاني..؟..(هكه في هكه لا تحسبونا سمن في قاروره) على قولت اللحوج .. الله يحفظهم .. نحنا عمال المصافي لمّا نضرب معناته.. نبا حقتنا المشاهرات من الحكومة الشرعية .. طيب تبو حقتكم المشاهرات تمام.. محد قلكم لا.. بس خلوها بالهداوة وبالصلاة على النبي .. الامور تجي .. دلا ..دلا.. حبة.. حبة .. مش على كل (فسية ) قمتوا فعلتوا (اضراب) ..ماله ولمًا وين.. ماله وبعدين.. شعوكم تعبتونا .. يا لوماه … ماشي يقع هذا الخبر.. عيب عليكم.. الاضراب حقكم خبط البلاد خبط .. خلا المواطن بلا بترول .. ولا ديزل .. ولا غاز.. لا كرهبه .. ولا ماي.. والبوابير توقفت.. وحال المستشفيات في خطر.. هات من متاعب وبلاوي يتجرعها الناس بسبب الاضراب حقكم..

طيب خلاص اللي فات مات.. ذلحين خلونا في الان.. سمعنا ان الرئيس(عبدربه) .. جا (يوم لثنين ) الماضي لاعندكم لمًا المصافي .. نبا الناس تعرف شوه قلً لكم ..؟ شوه قًل لنا .. قًل لنا ..خلاص بنعطيكم مشاهراتكم المتأخرة .. بس لاعاد تضربوا ثاني مرة..الاضراب يضر بحياة المواطن.. بالله عليكم قلكم ((الرئيس عبدربه)) بعطيكم حقتكم المشاهرات المتأخرة ..؟ يه .. قلنا هذا الكلام .. والناس كلهم يعرفوا .. والخبر جاء في التلفزيون والريديون وفي الجرايد..وجه الحكومة بالوفاء بالتزاماتها تجاه عمال المصافي .. وبعدين ..؟ وبعدين يا (لحجي) .. ياراسي وعيني .. نحنا نعرف الاصول .. احترمنا ((رئيسنا عبدربه)) لكبر سنه وصلعته ..واحترمنا كلامه ورفعنا الاضراب وذلحين منتظرين المشاهرات.. ايوه وبعدين.. ؟ وبعدين يا (لحجي) بنشوف الصدق من الكذب.. ان جات المشاهرات كان بها ويا دار مادخلش شر .. وان كان ماشي جت بيكون لنا خبر ثاني – معناته – عاد معاكم خبر ثاني ..؟ ايوة .. طيب شوه هذا الخبر الثاني شعاكم فجعًتونا ..

خلاص رئيس الحكومة الشرعية (بن دغر) اجتمع يوم الاثنين الماضي مع اللجنة المكلفة بحل مشكلة ((البيس)) – على ما تقولو.. المشكلة المالية العويصة .. بين المصافي وشركة النفط .. بعدن .. وقالوا انه بيعطوكم مع مشاهرة يناير.. (مشاهرة شهر) من المتاخرات .. خلاص فُرجت نزلت عليكم(ليلة القدر) يا حيا ومرحبا بالبيس .. استعدوا بالجواني والطرابيل منشان تعرفوا تحطوا فيها (البيس) حقت شهرين .. ماشاء الله مشاهرة الواحد في المصافي..زايد على مشاهرة (الرئيس عبدربه).. احمدوا الله شوه عادكم تبوا .. سكيتو علينا انكم بلا مشاهرات .. وهات يا اضراب في اضراب .. طلع الخبر ثاني .. وانتو تستلموا المشاهرة كل شهر بشهره – احسن من غيركم – بس تطالبوا بالمشاهرة حقت(شهور الحرب) .. وهذا من حقكم نحنا معاكم على قلب ورب.. بس الاضراب ماشي يقع.. شوفوا مرة من مرة الله يعلم كيف بتكون الخاتمة .. البلاد حالها ما يتحمل .. والناس كلهم في (جحر الحمار) .. طيب شوه عاد معكم من خبر ..؟ خلاص قدكم با تستلموا (مشاهرة يناير) فوقها مشاهرة شهر من (المتأخرات) وعلى هذي الطريقة الى ان تنتهي هذي المشكلة .. عجبكم الخبر ولا ماشي عجبكم .. ؟ عيب عليك يا (لحجي) انته تبا تجرجرنا في الكلام.. تدخل معانا في خبر وتخرج في خبر ثاني.. شوف يا (لحجي) .. نحنا بنقلك الصدق .. شوف اخر كل شهر بنكون بنهب لعند (صاحبت الفال).. ايوه .. ايوه.. شوه لامها من دخل ..(صاحبة الفال) في المشاهرة حقتكم ..؟ كيف شوه لامها من دخل .. بنضرب عندها(فال) .. على طريقة جداتنا حقون زمان اول.. ماشي عاد معانا حل ثاني يا (لحجي) الا (صاحبة الفال) منشان نعرف راسنا من رجولنا ..وشي بتجي (مشاهرة شهر) من حقت(المتأخرات) مع المشاهرة والا .. لا.. لان الحكومة حقتنا يا (لحجي) .. ماشي عليها (وكنة) ولا لابوها امان.. ولا تعرف صدقها من كذبها.. دوب تلاعبنا حنق خمسة في ستة.. طيب لا قالت (صاحبة الفال) .. لا ماشي بيجيبوالكم (مشاهرة المتأخرات) .. معناته بترجعوا للاضراب ثاني مرة؟ شوف يا (لحجي) .. مالك ومال هذا الخبر ماشي وقته ذلحين .. انته خلي الخبر بالعكس .. لا قالت (صاحبة الفال) .. يه لكم مشاهرة .. معناته خلاص بنكون نحنا والرئيس هادي وبن دغر والحكومة الشرعية صحاب وسمن على عسل …خلاص ذلحين افتهم لك كلامي يا(لحجي ) .. نحنا عطيناك الكيس برباطه .. وانته دوّرها في راسك بعدين اكتب اللي تبا..؟ ايوه افتهم لي وماشي افتهم لي.. والله جينا على (وقت عوج) يبا قليل(مساناة) .. يا حسرتاه عليش يا (مصافي عدن) حقت زمان.. وين كنتي (شعلة تلهب) .. وكيف اصبحتي اليوم (شعلة طافية ) بلا نار .. من بعد (اربعة وتسعين) حولوش الى بقرة تحلب وتكر (بيس) لاداخل جيوب المتنفذين والسرق والطواهيش الكبار .. وهم معروفين بالاسامي والرتب العسكرية.. وعلى راسهم ((اللطاش والطاهوش الكبير)) علي عبدالله صالح .. اللي استحوذ على المصافي من ساسها لا راسها وعلى الجنوب بكله .. وحان الوقت لفتح (ملف المصافي) .. ليعرف الناس حقيقة النهب اللي جرى – ويجري – داخلها .. والله اني اتألم كثير وحزين للغاية وقلبي يوجعني لحال المصافي اليوم.. لأني كنت متابع لمسيرتها من زمان .. وكانت تربطني بهذي الشركة العملاقة عبر ادارة العلاقات العامة والاعلام فيها.. علاقات طيبة وجميلة من السبعينات لمّا كنت (مدير عام لمؤسسة وصحيفة صوت العمال).. .. ومازلت احتفظ بالنشرات الاعلامية الجميلة .. اللي كانت تصدر عنها شهرياً وبأنتظام .. وكان لي فيها صحاب واحبة قدامى .. ومن حسن حظي اني كنت حاضراً في (سنة ثمانين ميلادية) حفل عودة ملكيتها الى الدولة في ذلك الزمان الجميل .. اللي سأكتب عنه لاحقاً .. ان شاء الله .. بس كفاية (اضرابات ومضرابات) قدنا كلنا في الهوى سوى .. وكلنا في التنك..!